دھمکانے کی کوششوں پر ایران کی تلافی نہیں ہونی چاہیے

یہ ترجمہ امریکی دفترخارجہ کی جانب سے ازراہ نوازش پیش کیا جارہا ہے۔ برائے فوری اجرا دھمکانے کی کوششوں پر ایران کی تلافی نہیں ہونی چاہیے امریکی دفتر خارجہ دفتر برائے ترجمان برائے فوری اجرا 11 دسمبر 2020 وزیر خارجہ مائیکل آر پومپیو کا بیان   امریکہ ایران کی مجلس اور شوریٰ نگہبان کی جانب سے حال ہی میں منظور کیے جانے والے قانون کی مذمت کرتا ہے جو ایرانی حکومت کی اپنے جوہری پروگرام کے ذریعے عالمی برادری کو دھمکانے کی تازہ ترین مہم کے سوا کچھ نہیں۔ عملدرآمد کی صورت میں یہ قانون ایران کی جانب سے افزودہ یورینیم کو 20 فیصد کی خطرناک سطح پر لے جائے گا جبکہ ایران پہلے ہی افزودگی کی سطحوں کے حوالے سے 'جے سی پی او اے' میں طے شدہ حدود سے آگے بڑھ رہا ہے اور اس کے ساتھ ساتھ اپنے یورینیم کے ذخائر کو وسعت دینے اور جدید سینٹری فیوج پر تحقیق، ان کی پیداوار اور انہیں نصب کرنے میں مصروف ہے۔ ایران نے ایسی کوئی قابل اعتبار تکنیکی توجیہ پیش نہیں کی کہ اسے کسی پرامن مقصد کے لیے عجلت سے افزودہ یورینیم کو اس سطح پر لے جانے کی ضرورت کیوں محسوس ہوئی۔ اس قانون کے تحت ایرانی حکومت ایٹمی توانائی کے عالمی ادارے (آئی اے ای اے) کے ساتھ پہلے ہی ناقابل قبول سطح کے تعاون کو محدود کرنے کی پابند ہو گی۔ ایران نے قریباً دو سال تک اپنے ہاں ممکنہ غیراعلانیہ جوہری مادوں اور سرگرمیوں سے متعلق سوالات کا جواب لینے کے لیے آئی اے ای اے کی کوششوں کو روکا ہے جس کے نتیجے میں آئی اے ای اے کے بورڈ نے جون 2020 میں مطالبہ کیا کہ ایران جوہری عدم پھیلاؤ سے متعلق میثاق میں حفاظتی اقدامات سے متعلق معاہدے اور اضافی مسودے پر پوری طرح عملدرآمد کرے۔ ایران کی جانب سے آئی اے ای اے کے ساتھ تعاون میں کمی یا 20 فیصد سطح تک یورینیم کی افزودگی سے صورتحال میں سنگین نوعیت کی شدت جنم لے گی جس کے نتیجے میں ایران جوہری ہتھیار حاصل کرنے کی صلاحیت سے قریب تر ہو جائے گا۔ عالمی برادری معاشی تشفی کے ذریعے ایرانی حکومت کو اوچھے ہتھکنڈوں کے ذریعے فوائد حاصل کرنے کی اجازت نہ دے۔ اگر ایرانی حکومت پابندیوں سے چھٹکارا اور معاشی مواقع کا حصول چاہتی ہے تو پھر اسے پہلے جوہری استحصال کے خاتمے اور ایک جامع معاہدے پر مذاکرات کے ذریعے یہ ثابت کرنا ہو گا کہ وہ اپنے طرزعمل میں بنیادی تبدیلی لانے کے لیے سنجیدہ ہے۔ یہ معاہدہ ایران کی بلسٹک میزائلوں کی تیاری اور دہشت گردی کی حمایت، ناجائز گرفتاریوں اور خطے میں دیگر تخریبی سرگرمیوں کی ضمانت دے گا۔ عالمی برادری واضح طور پر سمجھتی ہے کہ ایران کو مزید تاخیر کیے بغیر آئی اے ای اے سے مکمل تعاون شروع کرنا چاہیے۔ ایسا کرنے میں ناکامی کی صورت میں اسے عالمی برادری کی جانب سے رعایات نہیں ملنی چاہئیں بلکہ ایرانی حکومت پر سفارتی و معاشی دباؤ اور اسے تنہا کرنے کا عمل جاری رہنا چاہیے۔

---

کسی بھی وقت منقطع کرنے کے لیےاپنے اکاؤنٹ کے ترجیحات والے صفحہ پر جائیں۔ لاگ ان کرنے کے لیے آپ کو اپنے ای میل کا اندارج کرنا ہوگا۔.

اگر آپ کو سلسلہ فراہمی معلومات کے بارے میں کچھ پوچھنا ہے یا اس حوالے سے مشکلات کا سامنا ہے تو مہربانی کر کے اس ای میل پر subscriberhelp.govdelivery.com رابطہ کریں۔

 

آپ کو یہ سہولت دفتر خارجہ کے بین الاقوامی میڈیا سے رابطہ کے شعبہ کی طرف سے بغیر کسی معاوضے کے فراہم کی گئی ہے۔

This email was sent to stevenmagallanes520.nims@blogger.com using GovDelivery Communications Cloud on behalf of: Department of State Office of International Media Engagement · 2201 C Street, NW · Washington, DC · 20520